गृहमन्त्रीको राजीनामा माग्दा पक्राउ परेका नेविसंघ नेताको तत्काल रिहा होस्: कांग्रेस

होमल्याण्ड खबर

२०८३ बैशाख ९ गते, बुधबार १६:१९ मा प्रकाशित

नेपाली कांग्रेसले नेपाल विद्यार्थी संघ (नेविसंघ) का नेताहरूलाई पक्राउ गरिएको घटनाप्रति आपत्ति जनाएको छ। गृहमन्त्री सुधन गुरुङको राजीनामा माग्दै सिंहदरबार परिसरमा प्रदर्शन गर्न पुगेका नेविसंघ नेताहरूलाई हिजो पक्राउ गरिएको थियो। कांग्रेसका प्रवक्ता देवराज चालिसेका अनुसार पक्राउ पर्नेमा नेविसंघका केन्द्रीय सदस्य ईं. भुवन भट्ट तथा विद्यार्थी नेताहरू कुम्भराज देउवा, नवीन विष्ट, आकाश देवकोटा, सुशील ऐडी र विशाल वि.सीलगायत छन्।

कांग्रेसले जारी गरेको विज्ञप्तिमा लोकतान्त्रिक शासन व्यवस्थामा वाक तथा प्रकाशन स्वतन्त्रता, शान्तिपूर्ण रूपमा हिँडडुल गर्ने अधिकार तथा विरोध वा असहमति व्यक्त गर्ने स्वतन्त्रता नागरिकका मौलिक अधिकार भएको उल्लेख गरेको छ। यस्ता अधिकारको सम्मान र संरक्षण गर्नु राज्यको संवैधानिक तथा नैतिक दायित्व रहेको कांग्रेसको भनाइ छ।

विज्ञप्तिमा नागरिकले आफ्नो अधिकार प्रयोग गर्ने क्रममा पक्राउ गरी थुनामा राख्ने कार्यले लोकतन्त्रका आधारभूत मूल्य, विधिको शासन तथा नागरिक स्वतन्त्रताको प्रत्याभूतिमाथि गम्भीर प्रश्न उठाएको उल्लेख गरिएको छ।

कांग्रेसले असहमतिलाई नियन्त्रण गर्ने र दमन गर्ने सरकारको शैली लोकतान्त्रिक मान्यता तथा संविधानको मर्मविपरीत रहेको ठहरसमेत गरेको छ।

सम्बन्धित खबर

महान्यायाधिवक्ता कँडेलविरुद्धको रिटमा कारण देखाउ आदेश

आज पनि घट्यो नेप्से

नागरिकको सेवामा खटिनु हाम्रो दायित्व हो : प्रहरी महानिरीक्षक कार्की

ओपीडी सेवा नखुम्च्याउन सरकारलाई कांग्रेस महामन्त्री पौडेलको आग्रह

सरकारी विज्ञापन नीतिविरुद्ध पत्रकार महासंघको देशव्यापी विरोध

आज पनि घट्यो सुनको मुल्य