सम्पत्तिका लागि बाबुको हत्या गर्ने छोरा १८ वर्षपछि पक्राउ

होमल्याण्ड खबर

२०८३ बैशाख १८ गते, शुक्रबार १४:०३ मा प्रकाशित

आफ्नै बाबुको हत्या गरी फरार रहेका व्यक्ति १८ वर्षपछि पक्राउ परेका छ्न्।  रौतहट प्रहरीले चितवनबाट उनलाई नियन्त्रणमा लिँदै वर्षौंदेखि रहस्यमा रहेको हृदयविदारक पारिवारिक हत्याकाण्ड सार्वजनिक भएको छ ।

जिल्ला प्रहरी कार्यालय रौतहटले बिहीबार साँझ प्रेस विज्ञप्ति जारी गर्दै २०६४ साल जेठ २० गते गरुडा नगरपालिका–१ साबिक जयनगर–४ का ६८ वर्षीय विशेष महतो कोईरीको निर्ममतापूर्वक हत्या भएको घटनामा संलग्न उनका कान्छा छोरा राम बिलास महतो १८ वर्षपछि पक्राउ परेका हुन्। कर्तब्य ज्यान मुद्दामा फरार रहेका महतो त्यतिखेर ३१ वर्षका थिए भने हाल ४९ वर्षका पुगेका छ्न् ।

आर्थिक संकट,ऋणको चाप र जग्गा विवादबाट छुटकारा पाउने उद्देश्यले महोतोले योजनाबद्ध रूपमा आफ्नै बाबुको हत्या गरेका थिए। बाबु सुतिरहेको अवस्थामा हातखुट्टा बाँधी धारिलो हतियार प्रयोग गरी शरीरका विभिन्न भागमा प्रहार गरी हत्या गरिएको प्रारम्भिक अनुसन्धानबाट खुलेको छ।