८ मंसिर २०८१, शनिबार
२०७४ माघ १४ गते, आईतवार ०७:०६ मा प्रकाशित
१० वर्षमा ४० हजार मेगावाट विद्युत् उत्पादनको मुख्य नारासहित शनिबारदेखि काठमाडौंमा नेपाल पावर इन्भेष्टमेन्ट समिट २०१८ सुरु भएको छ । ऊर्जा विकास परिषद् (ईडीसी) को मुख्य आयोजनामा सुरु भएको पावर समिटिमा राष्ट्रपति विद्यादेवी भण्डारीले सरकारले जलविद्युत् लगानीमैत्री वातावरण बनाउने बताइन् । जलविद्युत्मा बाह्य लगानी आकर्षित गर्नुपर्ने बताउँदै उनले यसका लागि सरकारले सबै किसिमको वातावरण बनाउनुपर्नेमा जोड दिइन् । “नेपालको जलविद्युत् विकास गर्न सके नेपालको मात्र होइन, छिमेकी राष्ट्रहरूको विकासमा पनि सहयोग पुग्छ,” उनले भनिन्, “नेपालको जलविद्युत् विकासका लागि प्रशस्त लगानीको सम्भावना छ, ढुक्क भएर लगानी गर्नुस्, सरकार यसका लागि सहयोग गर्न तयार छ ।”
संघीय र केन्द्रको निर्वाचनपछि सबैको ध्यान आर्थिक समृद्धिमा केन्द्रित भएको बताउँदै उनले अब नेपालको ध्यान जलविद्युत् विकासमा केन्द्रित हुने बताइन् ।
नेपालका लागि भारतका राजदूत मञ्जिव सिंह पुरीले आर्थिक समृृद्धिका लागि जलविद्युत् विकास महतवपूर्ण रहेको बताउँदै भारतले नेपालमा नौ सय मेगावाटका अरुण तेस्रो र माथिल्लो कर्णालीका साथै पञ्चेश्वर र कोशी उच्च बाँध आयोजनाको निर्माणमा सहकार्य गरी अघि बढेको बताए । अरुण तेस्रोको निर्माण सुरु भएको बताउँदै उनले यसको विकासबाट नेपालप्रति अन्तर्राष्ट्रिय जगतमा सकारात्मक सन्देश जाने बताए ।
परिषद्का अध्यक्ष सुजित आचार्यले परिषद्ले नेपाल जलविद्युत् लगानीका लागि उपयुक्त थलो भएको बताउँदै शून्य प्रतिशत आयकर, शतप्रतिशत लगानी फिर्ता र फाइदा, डलरमा विद्युत् खरिद सम्झौता (पीपीए) लगायतका सुविधा रहेको जानकारी दिए । भारत, चीन, बंगलादेश, युरोप, कोरिया, अमेरिकालगायत देशका ५५ विज्ञहरूको प्रस्तुतीकरण रहेको पावर समिटमा स्वदेशी तथा विदेशी गरी पाँच सय प्रतिनिधि सहभागी रहेको परिषद्का सचिव सुशील पोखरेलले जानकारी दिए । तीन दिनसम्म सञ्चालन हुने समिटमा नेपालको जलविद्युत् क्षेत्रमा वैदेशिक लगानी भित्र्याउनका लागि विश्वका प्रतिष्ठित कम्पनीहरू र लगानीकर्ताहरू तथा नेपालका प्रवद्र्धकहरूबीच प्रत्यक्ष साक्षात्कार गर्ने कार्यक्रम छ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
