बिजुलीबजारस्थित आर्क ब्रिजको रंगरोगन पूरा, फेसन पेन्टस्ले आफ्नै खर्चमा पारिदियो चिटिक्क

होमल्याण्ड खबर

२०७७ आश्विन २८ गते, बुधबार १५:२२ मा प्रकाशित

काठमाडौंको बिजुलीबजारस्थित धोबिखोलामाथि निर्माण भएको नेपालकै पहिलो नेटवर्क आर्कब्रिज रङरोगनको काम सकिएको छ । पेन्टस् कम्पनीहरु मध्येको उत्कृष्ट फेसन पेन्टस् प्रालिले आफ्नै खर्चमा बिजुलीबजारस्थित दुईवटै आर्क ब्रिज रङ रोगन गरेर चिटिक्क पारेको हो ।
रंगरोगन गरिएको दुई पुलको कुल पेन्टस् एरिया २१ हजार वर्गफिट रहेको छ । यसलाई रंगाउन पेन्ट्स र प्राइमर दुवै पाँच–पाँच सय लिटर लागेको कम्पनीले जनाएको छ । कम्पनीका अनुसार, रंगरोगन र श्रमिकको ज्याला गरी दुई पुल पेन्ट गर्न करिब १३ लाख रुपैयाँ खर्च भएको छ ।
उपत्यका सडक विस्तार आयोजनाले गत असारमा यस पुलको रंगरोगनका लागि आवश्यक पर्ने सम्पूर्ण खर्चसहितको काम सौजन्यका लागि इच्छुक पेन्टस् कम्पनीहरुबाट प्रस्ताव आह्वान गरेको थियो । सोही प्रस्तावमा आवेदन दिएका कम्पनीहरुमध्ये पुल रंगाउन फेसन पेन्ट्स छनोट भएको हो ।
आयोजनाले फेसन पेन्ट्ससँग असोज मसान्तसम्ममा पुल रंगरोगनको काम सक्नेगरी सम्झौता गरेको थियो । कोभिड(१९ )का कारण काम सुरु गर्नमा केही ढिलाइ भएको भए पनि कम्पनीले सम्झौता अवधिभन्दा करिब १० दिनअघि नै रंगरोगन सकेको छ । सम्झौता बमोजिम यी दुवै आर्कब्रिजमा फेसनले पाँच वर्षसम्म पेन्टस् सौजन्य पाएको छ । जसअनुरुप कम्पनीले तेस्रो वर्षमा पुनः रंगरोगनको काम (रिपेन्टिङ) गर्नु पर्नेछ ।

हाल यी दुवै पुलमा रंगरोगनका लागि आयोजनाले नै स्पेसिफिकेसन तोकेर डिजाइन तयार पारेको थियो । सोही स्पेसिफिकेसन अनुसारको गुणस्तरको रंग लगाएको कम्पनीले आयोजनाले तयार पारेको डिजाइनमा भने सवारी साधन आवतजावतमा बाधा नपुगोस् भन्ने हेतुले ड्राइभिङ फ्रेन्ड्ली हुनेगरी सुझाएर सादा सेतो रंग लगाएको छ । जसमा पुलको माथिल्लो भागमा भने माथिबाट हेर्दा नेपाली झण्डाको जस्तो नीलो र रातो रंग लगाइएको छ ।

दुवै पुलको रंगरोगनमा फेसन पेन्ट्सले आफैंले उत्पादन गरेको सबैभन्दा प्रिमियम गुणस्तरको रंग ’वेदरप्रुफ प्रिमियम एक्सटेरियर इमल्सन’ प्रयोग गरेको छ । कम्पनीले आफ्नो सबैभन्दा उत्कृष्ट उत्पादन बताएको यस रंगमा आम उपभोक्ताका लागि ७ वर्षको वारेन्टी दिएर बिक्री गरिरहेको छ ।
फेसन पेन्टस्ले दैनिक ८ देखि १० जनासम्म श्रमिक खटाएर १७ दिनमा पुल रंगाउने काम पूरा गरेको हो ।

रंगरोगनमा स्वास्थ्य सुरक्षा सतर्कता अपनाउँदै कामदारहरु परिचालन गरेको कम्पनीका अधिकारीहरुले बताए ।
यी दुइटै पुललाई रातिको समयमा जीवन्त राख्न केही समयअघि बत्ती समेत जडान गरिएको छ ।

सम्बन्धित खबर

सार्वजनिक पदाधिकारीको सम्पत्ति विवरण सार्वजनिक गर्न सूचना आयोगको सुझाव

परराष्ट्रमन्त्री राणा चीन प्रस्थान

चुरियामाई उकालोमा कन्टेनर पल्टिँदा पूर्वपश्चिम राजमार्ग अवरुद्ध

बाराको रामराजा क्याम्पस प्रमुखको हत्यामा संलग्न मुख्य आरोपी पक्राउ

उद्योगहरूको बिजुली नकाट्ने प्राधिकरण बोर्डको निर्णय

कीर्तिपुरमा जित सुनिश्चित बनाउँदै माओवादी