४ मंसिर २०८१, मंगलवार
२०७७ पुष १३ गते, सोमबार १६:०६ मा प्रकाशित
राष्ट्रपति र प्रधानमन्त्रीसँग भेटपछि खुमलटार पुगेको चिनियाँ टोलीले प्रचण्डलाई ब्याक हुन भनेको स्रोतले बतायो । चिनियाँ टोलीले ब्याक हुन दबाब दिएपछि प्रचण्डमा तनावमा परेको एक नेताले बताए । अब के गर्ने अन्यौल बढेको छ ।
नेकपा एकबद्ध हुनुपर्ने त्यसका लागि दुबै पक्षले त्याग गर्नुपर्ने बेइजिङको सन्देश प्रचण्डलाई भेटमा सुनाइएको थियो । चिनियाँ टोलीले आजै वरिष्ठ नेता माधवकुमार नेपालसँग पनि भेट गरेर एकताका लागि आफ्नो अडानबाट लचिलो हुन र मिल्न दबाब दिनेछ ।नेताहरुलाई प्रभाव वा दबाब अथवा धम्क्याएर भए पनि पार्टी फुट्न नदिने चिनियाँहरुको रणनीति रहेको सम्बद्ध स्रोत बताउँछ।
नेपाल कम्युनिस्ट पार्टी (नेकपा प्रचण्ड–माधव नेपाल पक्ष)का अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीको सरकार विघटन भएको तर संसद जीवितै रहेको बताएका छन्।
यही पुस ५ मा संविधानमा नभएको अधिकार प्रयोग गरी प्रतिनिधिसभा विघटन गरेर प्रधानमन्त्री ओलीले आफूहरुलाई जनतासँग फेरि जोडिने माैका दिएकाे बताए।
‘केपी ओलीको सरकार विघटन भएको हो, संसद जीवितै छ’, पेरिसडाँडास्थित पार्टी कार्यालयमा आज आयोजित एक कार्यक्रममा उनले भने, ‘आफूचाहिँ इतिहासको कलंकको टीका लगाउनुभयो, हामीलाई चाहिँ जनतासँग जोडिदिनुभयो।’
२०४७ सालको संविधानले संसद विघटन गर्ने अधिकार दिएकै कारण सरकारहरु छोटो समयमात्रै टिकेको बताउँदै त्यही देखेर ०७२ सालमा संविधान बनाउँदा प्रधानमन्त्रीलाई संसद विघटनको अधिकार नदिने व्यवस्था गरेको उनको भनाइ छ।
त्यतिबेला अर्थात् दोस्रो जनआन्दोलनको सफलतापछि प्रतिनिधिसभाभित्र सरकार गठनको विकल्प हुँदासम्म विघटन गर्न नहुनेमा स्वयं ओली पनि सहमत भएको बताउँदै उनले सदनभित्र विकल्प हुँदासम्म सरकार गठन हुनसक्ने अवस्था हुँदाहुँदै ओलीले संसद विघटन गरेको बताए।
तीन करोड नेपाली जनताको सार्वभौम अधिकारमाथि ओली सरकारले प्रहार गरेकोले यसविरुद्ध डटेर लाग्ने प्रचण्डले बताए। अध्यक्ष प्रचण्डले ओलीलाई संविधानले हुँदैन भनेको अधिकार प्रयोग गरेर सदन विघटन गरेको बताएको उल्लेख गरे। तर उनले गरेको कार्य अवैधानिक भएकोले संसद विघटन नभएको प्रचण्डकाे दाबी छ।
पार्टीभित्र विवाद चलेकोमा दुईमत नरहेको बताउँदै उनले व्यक्तिवादी तरिकारले सरकार चलेको कारण समस्या आएको बताए। आफूहरु जनताको हक र लोकतन्त्रको पक्षमा सडकमा आयौँ भनेकोमा अनर्गल प्रचार भएको प्रचण्डले बताए।
उनले केपी ओली श्री३ महाराज बन्ने बाटोमा अघि बढेको र आफूहरु जनतासँग गएको बताए।
प्रचण्डले भने, ‘पहिले पनि भन्ने गरेको छु, ज्ञानेन्द्रको भिलेन रुपले पनि हामीलाई हिरो बनाइदिएको थियो, अहिले केपी ओलीले फेरि प्रतिगमनविरुद्ध जनतामा जाने अवसर दिए।’
ऐतिहासिक जिम्मेवारी पूरा गर्न एक भएर लाग्नुपर्ने भएकोले चिन्ता लिनुपर्ने विषय नभएको प्रचण्डले बताए। उनले वैशाखपछि पुनः ओली आउने भन्दै हँसीमजाक समेत गरे। आफूहरु क्षमा दिनेखालको भएकाले क्षमा दिने ठट्टा समेत प्रचण्डले गरे।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
