४ मंसिर २०८१, मंगलवार
२०७७ चैत्र ४ गते, बुधबार १३:२६ मा प्रकाशित
नेकपा एमालेका वरिष्ठ नेता झलनाथ खनालले एमालेमा गुटबन्दी सुरु गर्ने नेता अध्यक्ष केपी शर्मा ओली नै भएको टिप्पणी गरेका छन् ।
बुधबारदेखि राजधानीमा सुरू भएको राष्ट्रिय कार्यकर्ता भेलालाई सम्बोधन गर्दै उनले एमालेमा गुट सुरु गर्ने केपी ओली भएको भन्दै मदन भण्डारी फाउन्डेसनमार्फत उनले नै गुटको सुरूवात गरेको दाबी गरे ।
उनले पछिल्लो समय पार्टीमा आएको समस्या पनि ओलीकै कारण आएको बताए ।
उनले आफूहरूले नेपालको कम्युनिस्ट आन्दोलन र लोकतान्त्रिक आन्दोलनको विशेष अवस्थामा यो भेला आयोजना गरिरहेको बताए ।
ओलीले मनपरीतन्त्र र अहंकारले ग्रस्त भएर पार्टीलाई बेवास्ता गरेर एकलौटी ढंगले अघि बढ्न खोजेको बताए । पार्टी एकीकरणपछि पार्टी जुन ढंगले अघि बढ्ला भन्ने अपेक्षा थियो त्यस अनुसार हुन नसकेको उनको भनाइ छ ।
पूर्व प्रधानमन्त्रीसमेत रहेका खनालले केपी शर्मा ओलीले यो तीन वर्षमा स्वयं भ्रष्टाचारीलाई संरक्षण गरेको गम्भीर आरोप लगाएका छन् । उनले महत्वपूर्ण नियुक्तिमा पनि प्रधानमन्त्री ओलीले आफ्ना धुपौरेहरुलाई मात्रै गरेको खनालको आरोप छ ।
प्रधानमन्त्री ओलीले विवादस्पद विधेयक ल्याएको र ती विधेयक ल्याउँदा पार्टीसँग कुनै सल्लाह नगरेको खनालले स्पष्ट पारे। उनले पछिल्लो समय प्रधानमन्त्री ओलीले बैठकहरुसमेत नराखेको गुनासो पोखे ।
उनले पार्टीको संगठनात्मक अवस्थामा अराजकता नै अराजकता भएको बताउँदै आफूहरू पार्टी एकता जोगाउने काममा लागिपरेको सुनाए।
नेता झलनाथ खनालले केपी ओलीको सरकारले पार्टी नीति, सिद्धान्तको पालना नगरेको दाबी गरेका छन् । उनले ओली सरकारले ल्याएको तीन आर्थिक वर्षको बजेटका नीति तथा कार्यक्रमले पार्टीका नीति, कार्यक्रम प्रतिबिम्बित हुन नसकेको बताएका हुन् ।
‘एकीकरणपछि पार्टी जुन ढंगले अघि बढ्ला भन्ने अपेक्षा थियो। त्यसो भएन। हामीले प्रश्न उठाउन थालेपछि दुई तिहाइ बहुमत रहेको संसद्को विघटन गर्नुभयो’ उनले भने, ‘त्यो संविधानलाई उल्लंघन गर्ने घटना थियो। त्यो राजनीतिक घटना र संवैधानिक घटना थियो। त्यसैले हामीले संवैधानिक र राजनीतिक लडाइँ लड्यौं।’
सरकारको तीन वर्षका नीति र कार्यक्रममा पार्टीमा कुनै सरसल्लाह नभएको बताए। ‘पार्टीका नीति र कार्यदिशा प्रतिबिम्बित भएन। तीनवटा बजेट आयो। तर, पार्टीका नीति र सोच प्रतिबिम्बित भएन। पार्टीसँग सरसल्लाह गरिएन’ उनले भने ।
खनालले २० को दशकबाट देशमा नेपाल कम्युनिष्ट पार्टीलाई पुन गठन र एकीकरणको थालनी गरेको बताए । एमाले र माओवादी केन्द्रको एकीकरणले ठूलो सफलता हासिल गरे पनि सोचेजस्तो परिणाम दिन नसकेको स्पष्ट पारे ।
उनले सर्वोच्च अदालतको रहस्यमय फैसलाले तीन वर्ष पछाडि पुगेर काम सम्पन्न गर्नुपर्ने अवस्था भएको धारणा राखे ।
उनले ओलीले केन्द्रीय कमिटीको बैठक राखेर पार्टीलाई अगाडि बढाउनुपर्नेमा बालुवाटारमा फाल्गुन २८ गते गुट बैठक गरेर एकलौटी निर्णय गरेको बताए । उनले आजको भेलाको छलफलबाट निस्किएको निचोडबाट अगाडि बढ्ने बताए ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
