प्रतिनिधिसभा विघटनसम्बन्धी मुद्दाको बहस आज सकिँदै

होमल्याण्ड खबर

२०७८ असार २१ गते, सोमबार ०९:४२ मा प्रकाशित

सर्वोच्च अदालतको संवैधानिक इजलासमा जारी प्रतिनिधिसभा विघटनसम्बन्धी मुद्दाको बहस आज सकिँदै छ । आज रिट निवेदक पक्षका बाँकी अधिवक्ता अदालतको सहयोगी एमिकस क्युरीले राय दिएपछि बहस सकिने छ ।

रिट निवेदक पक्षलाई जवाफी बहसका लागि छुट्याइएको ३ घण्टाको समयमा हिजो एक घण्टा सकिएको छ भने आज २ घण्टा बहस हुने छ । जवाफी बहसमा आज वरिष्ठ अधिवक्ता शम्भु थापा, बद्रीबहादुर कार्की र हरिहर दाहालले बहस गर्नेछन् ।

एमिकस क्युरीले आफ्नो राय दिएपछि मुद्दाको सुनुवाइ सकिनेछ । यसपछि फैसलाको प्रक्रिया अघि बढ्नेछ । फैसला कहिले दिने भन्ने जानकारी अदालतले आजै दिन सक्नेछ ।

प्रतिनिधिसभा विघटनसम्बन्धी मुद्दामा प्रधानन्यायाधीश चोलेन्द्रशमशेर जबरा तथा न्यायाधीशरू दीपककुमार कार्की, मीरा खड्का, ईश्वरप्रसाद खतिवडा र डा. आनन्दमोहन भट्टराई रहेको संवैधानिक इजलासमा सुनुवाइ भइरहेको छ ।

प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले जेठ ८ गते प्रतिनिधिसभा विघटन गरेपछि यसविरुद्ध सर्वोच्च अदालतमा ३० वटा रिट दायर भएका थिए ।

सम्बन्धित खबर

अर्थमन्त्री र निजी क्षेत्रका प्रतिनिधिबीच छलफल

बालेनलाई कमल थापाको अफर- ‘हिन्दूराष्ट्र स्वीकारे राप्रपाले दुई-तिहाइ पुर्‍याइदिन्छ’

‘धन्यवाद पत्र’ लिएर बिदा भए निर्वाचन प्रहरी

शान्तिसैनिकको सुरक्षामा नेपालको जोड

समानुपातिकतर्फ ५१ दलले कटाएनन् ‘थ्रेस होल्ड’

सुनको मुल्य तोलाको दुई हजारले बढ्यो