निगमले दसैंमा पाँचवटा जहाजबाट आन्तरिक उडान गर्ने

होमल्याण्ड खबर

२०७५ आश्विन १५ गते, सोमबार १२:५४ मा प्रकाशित

नेपाल वायुसेवा निगमले दसैंमा न्यूनतम पाँचथान जहाजबाट आन्तरिक उडान गर्ने घोषणा गरेको छ । आन्तरिक उडान गर्न हाल निमगसँग आठवटा जहाज छन् ।

निगमले ५८ सिट क्षमताका एक, १९ सिटे दुई र १७ सिटे दुई जहाजबाट दसैंमा उडान गर्ने घोषणा गरेको हो । अर्को एकथान ५८ सिटे जहाज भने दसैंअघि नै सञ्चालनमा ल्याउने गरी निगमले काम गरिरहेको जनाएको छ ।

“यसपालि दसैंमा पाँचथान जहाजबाट दुर्गम र सुगम भेगका गन्तव्यमा सकेसम्म धेरै उडान गर्ने लक्ष्य छ,” निगमका प्रवक्ता अशोक सिग्देलले आइतबार भने, “यात्रुका माग र आपूर्तिअनुसार टिकटको भाउ तय हुने छ भने गन्तव्य पनि त्यहीअनुसार हुनेछन् ।”

सरकारी कम्पनी भएका नाताले निगमले बिक्री गर्ने टिकटको भाउ निजी क्षेत्रका आन्तरिक वायुसेवा कम्पनीका दाँजोमा सस्तो रहेको छ । यसबाट पनि यात्रुले निगमका जहाजबाट यात्रा गर्न चाहने गर्छन् । तर, तोकिएको समयमा नउड्ने, टिकट नपाउने, अधिकांश समय जहाज ‘ग्राउन्डेड’ हुनेलगायत कारण निगममाथि यात्रुको विश्वास बढ्न सकेको छैन ।

प्रवक्ता सिग्देलका अनुसार एक महिनाभन्दा बढी समय त्रिभुवन अन्तर्राष्ट्रिय विमानस्थलमा ग्राउन्डेड भएको ‘मोडर्न आर्क’ (एमए–६०) सिरिजको ५८ सिटे एउटा जहाजले आइतबारबाट नियमित व्यापारिक उडान पुनः सञ्चालन गरेको छ ।

हाल निगमसँग ५८ सिटे दुईथान एमए–६०, १७ सिटे चारथान ‘वाई१२–ई’ र १९ सिटे दुईवटा ‘ट्विनअटर डिएचसी६’ सिरिजका जहाज छन् । तीमध्ये एमए–६० र वाई१२–ई चीनमा निर्मित जहाज हुन् । ट्विनअटर भने क्यानडामा निर्मित हुन् । निगमसँग रहेका ट्विनअटर न्यूनतम ४० वर्ष पुराना हुन् ।

आठ जहाजमध्ये दुइटा ट्विनअटर र एउटा एमए–६० त्रिभुवन विमानस्थलमा ग्राउन्डेड छन् । तिनको मर्मत कार्य चलिरहेको प्रवक्ता सिग्देलले जानकारी दिए । “मर्मत पूरा भएपछि असोज २० गतेबाट दुईथान ट्विनअटरले नियमित व्यापारिक उडान सुरु गर्नेछन्,” उनले भने, “अर्को एमए–६० लाई पनि दसैंअघि नै सञ्चालनमा ल्याउने गरी काम भइरहेको छ ।”

उनका अनुसार ग्राउन्डेड एमए–६० को ‘प्रोेपेलर’ मर्मत गर्न चीन पठाइएको छ । दसैंअघि नै ल्याउने गरी काम गर्न चिनियाँ जहाज निर्माता कम्पनीलाई आग्रह गरिएको छ । त्यसबाहेक एउटा एमए–६० लाई रात्रि उडानमा प्रयोग गर्ने तयारी भइरहेको छ । हाल धनगढी, नेपालगन्ज, भैरहवा, विराटनगर लगायत गन्तव्यमा रात्रि उडान सुविधा उपलब्ध छ ।

निगमसँग आन्तरिक उडान गर्न दुई दर्जनभन्दा बढी गन्तव्य छन् । ती गन्तव्यमा उडाउन हाल आठथान जहाज भए पनि चिनियाँमात्र सञ्चालनमा छन् । चारथान वाई१२–ईमध्ये दुईमात्र सञ्चालनमा छन् भने पाइलट अभावका कारण बाँकी दुईलाई निगमले उडानमा प्रयोग गर्न सकेको छैन ।

सरकारले एकैपटक चारथान खरिद गर्ने र दुइटा सिँत्तैमा पाउने गरी २०६९ मंसिर १४ मा ६ थान चिनियाँ जहाज खरिद सम्झौता गरेको थियो । यसका लागि चीनसँग साढे ३ अर्ब रुपैयाँबराबरको सहुलियत ऋण सरकारले लिएको छ ।  सरकारले सम्झौता गरेको र व्यापारिक उडान गर्ने भएका कारण चिनियाँ जहाजको सञ्चालन भने वायुसेवा निगमको जिम्मामा परेको थियो ।

चीनसँग भएको सम्झौताअनुसार चारथान वाई१२–ई र ५८ सिटे दुईथान एमए–६० सिरिज ल्याइएका थिए । निगमले अनुदानमा पाएका एक–एकथान वाई१२–ई र एमए–६० जहाज सुरुमा ल्याएको थियो । त्यसपछि खरिद गरिएकामध्ये वाई१२–ई र एमए–६० ल्याएको थियो । पछिल्लो पटक अन्तिम दुई वाई१२–ई ल्याएको थियो ।

सम्बन्धित खबर

चीन भ्रमणमा ऋणसम्बन्धी कुनै सम्झौता गर्दैनौँ : प्रधानमन्त्री

मन्त्रिपरिषद् बैठक बस्दै

प्रधानमन्त्री ओलीद्वारा चीन भ्रमणबारे पूर्वप्रधानमन्त्रीहरूसँग परामर्श सुरु

भन्सार दर घटेपछि तोलामै १५ हजार ९ सय घट्यो सुन

प्रधानमन्त्रीको भ्रमण चार दिने हुने, १८ गते सि जिनपिङसँग भेटबार्ता हुने

अस्ट्रेलियाको राजदूतमा चित्रलेखा यादव नियुक्त