११ मंसिर २०८१, मंगलवार
२०७५ मंसिर १९ गते, बुधबार ११:३८ मा प्रकाशित
बजेटमार्फत भ्याट फिर्ताको सुविधा हटेपछि आन्दोलनमा रहेका कपडा उधोगको संरक्षणका लागि सरकारले विभिन्न किसिमका छुट उपलब्ध गराउने तयारी गरेको छ । कपडा उधोगको संरक्षण सरकारको प्राथमिकता रहेकोले त्यसका लागि आवश्यक सुविधा उपलब्ध गराउने प्रस्ताव मन्त्रिपरिषद्मा लैजाने तयारीमा रहेको अर्थमन्त्री डा. युवराज खतिवडाले बताए ।
उधोगको संरक्षण हुने गरी विभिन्न किसिमका छुट सरकारले उपलब्ध गराउन लागेको उनले जानकारी दिए । उधोगका लागि आवश्यक कच्चा पदार्थमा छुट, कपडाको ‘प्रोसेसिङ’ मा छुट तथा लगानीको ब्याजदमा अनुदान दिने प्रस्ताव अघि बढाएका छौँ, उनले भने ।
सरकारले उधोगीले माग गरेजस्तो भ्याट फिर्ता वा नगद अनुदान भने दिन नसक्ने उनले स्पष्ट पारे । यति धेरै सुविधा उपलब्ध गराउने तयारी हुँदा पनि सन्तुष्ट नहुने हो भने उनीहरूले कस्तो उद्योग चलाउछन् ? उनको प्रश्न थियो । नगद अनुदान पनि एक किसिमको भ्याट फिर्तासरह नै हुने भएकोले सरकारले त्यो उपलब्ध गराउन नसक्ने उनले बताए । सरकारको मुख्य उद्देश्य कपडा उधोगको संरक्षण नै रहेकोमा जोड दिँदै उनले मन्त्रिपरिषद्ले मन्त्रालयको प्रस्तावमा अन्य थप सुविधा पनि दिन सक्ने बताए ।
गत मङ्सिर १ गते कपडा उधोगीले देशभरका कपडा उधोग बन्द गर्ने घोषणा गरेपछि अर्थ मन्त्रालयले समस्या समाधानका लागि उप सचिव हरिशरण पुडासैनीको संयोजकत्वमा एउटा कार्यदल बनाएको थियो । कार्यदलले तयार गरेको प्रतिवेदनको आधारमा मन्त्रालयले छुट सुविधाको प्रस्ताव तयार गरेको जनाएको छ ।
कपडा उधोगी भने सरकारले प्रस्ताव गरेका छुटले सञ्चालन खर्च उठ्न नसक्ने भन्दै कम्तीमा उधोग धान्न सक्ने किसिमको वातावरण सरकारले तयार गरिदिनुपर्ने बताउँछन् । भ्याट फिर्ता दिन नसके सरकारले नगद अनुदानको व्यवस्था गरेर स्वदेशी कपडा उद्योगको संरक्षण गर्नुपर्ने नेपाल कपडा उधोग सङ्घका उपाध्यक्ष जितेन्द्र लोहियाको भनाइ छ ।
हामीले भ्याट फिर्ता नै हुनुपर्छ भनेका छैनौँ, उनले भने, तर त्यसको विकल्पमा सरकारले उधोगको सञ्चालन खर्च धान्न पुग्ने वातावरण बनाउनुप¥यो । सरकारले अघि सारेका छुट सुविधाले केही थोरै राहत दिए पनि त्यो बजारमा प्रतिस्पर्धाका लागि पर्याप्त हुन नसक्ने उनले भने । घाटामा उधोग चलाउन सकिँदैन, उनले दाबी गरे, सरकारले वातावरण तयार गर्न सक्दैन भने हामीलाई सहजै उधोग बन्द गराइदिने व्यवस्था हुनुप¥यो । बजेट भाषणपछि उधोगको सञ्चालन खर्च बढेको र खुला सीमा हुँदै भित्रिने कपडाका कारण स्वदेशी कपडाले बजार गुमाउँदै गएको उधोगीको दाबी छ । यो आर्थिक वर्ष शुरु भएपछि करिब ५० प्रतिशत हाम्रो उत्पादन र बजार दुवै घटेको छ, सङ्घका अध्यक्ष शैलेन्द्र प्रधानले जानकारी दिए ।
खुला सिमाना र न्यून बिजकीकरणको समस्याले स्वदेशी उधोगको प्रतिस्पर्धात्मक क्षमता घट्दै गएको उनको भनाइ छ । २०७१ सालपछि उधोगले भ्याट फिर्ता पाएका कारण कपडामा लगानी बढे पनि चालु आर्थिक वर्षपछि भने उधोगी निराश भएको उनले बताए ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
