२३ फाल्गुन २०८२, शनिबार
२०८२ कार्तिक २२ गते, शुक्रबार १३:५९ मा प्रकाशित
नेपाली कांग्रेसका नेता डा.शेखर कोइरालाले परिस्थितिवश मङ्सिर मसान्तसम्म महाधिवेशन गर्न नसकिए पनि कुनै पनि हालतमा २०८२ पुस मसान्तसम्म सम्पन्न गरिसक्नुपर्ने बताएका छन् ।
काठमाडौँमा उपलब्ध जिल्ला सभापति तथा पूर्वजिल्ला सभापतिहरूसँगको अनौपचारिक छलफलमा डा.कोइरालाले आगामी आम निर्वाचनभन्दा पहिले महाधिवेशन सम्पन्न गरी नयाँ र ताजा नेतृत्वमा निर्वाचनमा जानुपर्ने आवश्यकता औँल्याएका हुन् । महाधिवेशनको तालिका बनाउँदा निर्वाचन आयोगको निर्वाचन तालिकामा असर नपर्नेगरी बनाउनुपर्ने उनको भनाइ छ ।
नेता कोइरालाले नेपाली कांग्रेस अहिले एकताबद्ध, गम्भीर, जिम्मेवार र संयम भई अघि बढ्नुपर्ने बताए । पार्टीसँग सम्बद्ध सबैले राष्ट्र, जनता र लोकतन्त्रलाई प्राथमिकतामा राख्नुपर्ने बताउँदै डा.कोइरालाले विगतमा पार्टीले थुप्रै आरोह अवरोह भोगेको स्मरण गरे । आगामी दिनमा एकता नै बल हो भन्ने भावनाअनुसार एक हुनुपर्ने र कसैले पनि ‘मेरो गोरुको बाह्रै टक्का’ भन्ने सोच राख्न नहुने कोइरालाको भनाइ थियो ।
डा.कोइरालाले पार्टीमा एकता, मेलमिलाप चाहेको र गुट, उपगुट तथा फुटको अन्त्य गर्नुपर्ने बताए । कोही कसैप्रति आग्रह–पूर्वाग्रह नराखी अघि बढ्नुपर्ने आवश्यकता रहेको बताउँदै देशभरका इमानदार, निष्ठावान् र निरन्तर क्रियाशील साथीहरूले पार्टीलाई बचाइरहेको बताए ।
डा.कोइरालाले पार्टीका लाखौँ शुभेच्छुकहरू र बाह्य सबै पक्षले अहिले कांग्रेसको निर्णय हेरिरहेको र पर्खिरहेको बताउँदै पार्टीले सही समयमा सही निर्णय लिनुपर्नेमा जोड दिए ।
कांग्रेसमा नियमित महाधिवेशन गर्ने कि विशेष महाधिवेशन गर्ने र नियमित महाधिवेशन गरेमा कहिले गर्ने भन्ने विषयमा विवाद छ । छलफलमा केन्द्रीय सदस्यहरू प्राडा.गोविन्दराज पोख्रेल र टेकप्रसाद गुरुङ पनि उपस्थित थिए । त्यस्तै मोरङ सभापति डिगबहादुर लिम्बू, रुपन्देही सभापति रामकृष्ण खाँण, नुवाकोट सभापति रमेश महत, खोटाङ सभापति विष्णु राई, चितवन सभापति राजेश्वर खनाल, सिन्धुलीको उज्ज्वल बरालसहित उपस्थित थिए ।
भेलामा गुल्मीका पूर्व सभापति त्रैलोक्यप्रसाद सेन, कास्कीका पूर्व सभापति यज्ञबहादुर थापासहितका नेताहरू पुगेका थिए ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
