२३ फाल्गुन २०८२, शनिबार
२०८२ माघ १० गते, शुक्रबार ११:५१ मा प्रकाशित
आगामी प्रतिनिधि सभा निर्वाचनका लागि झापा क्षेत्र नम्बर ५ बाट उम्मेदवारी घोषणा गरेका बालेन शाह यतिबेला पूर्वी पहाडको भ्रमणमा छन्। चुनावी सरगर्मी बढ्दै जाँदा शाह बिहीबार बिहान ताप्लेजुङस्थित प्रसिद्ध तीर्थस्थल पाथिभरा मन्दिर पुगेर पूजाअर्चना गरेका छन्।
श्रीपञ्चमीको संयोग पारेर पाथिभरा पुगेका शाहले मुलुकको समृद्धि र आफ्नो चुनावी अभियानको सफलताका लागि प्रार्थना गरेको उनको सचिवालयले जनाएको छ। झापा–५ को मैदानमा उत्रिएका शाहले छिमेकी पहाडी जिल्लाहरू ताप्लेजुङ, पाँचथर र इलामको भ्रमण गर्नुको राजनीतिक अर्थ देखिन्छ।
बुधबार झापाको दमकबाट प्रस्थान गरेका शाहले यात्राका क्रममा स्थानीय बासिन्दा, युवा र बालबालिकासँग भलाकुसारी गरेका थिए। उनी काफ्ले पाटीबाट पैदलै उकालो चढेर बुधबार साँझ ताप्लेजुङको माथिल्लो फेदी पुगेका थिए। ‘चुनावी मैदानमा उत्रिएपछि आत्मिक शक्ति र जनस्तरको सद्भाव दुवै चाहिन्छ,’ शाहको सचिवालयका एक सदस्यले भने, ‘श्रीपञ्चमीको शुभ दिनमा माताको आशीर्वाद लिएर नयाँ ऊर्जाका साथ चुनावी मोर्चामा होमिने उहाँको संकल्प हो।’
बालेन उम्मेदवार बनेको झापा क्षेत्र नम्बर ५ नेकपा एमालेका अध्यक्ष केपी शर्मा ओलीको निर्वाचन क्षेत्र हो। बालेनले आफ्नो चुनावी अभियानलाई पहाडी जिल्लाहरूसम्म पुर्याएर आफूलाई केवल ‘झापाको उम्मेदवार’ मात्र नभई पूर्वी नेपालकै भावनासँग जोडिएको पात्रका रूपमा प्रस्तुत गर्न खोजेको देखिन्छ।
बालेन पाथिभरा दर्शनपछि बिहीबार नै झापा झर्ने तालिका छ। झापा फर्किएलगत्तै उनले घरदैलो र मतदाता भेटघाटलाई थप तीव्रता दिने तयारी गरेका छन्।
मुलुकका प्रमुख शक्तिहरू र स्वतन्त्र उम्मेदवारबीच कडा प्रतिस्पर्धा हुने ठानिएको यस क्षेत्रमा बालेनको यो ‘धार्मिक-राजनीतिक’ यात्राले मतदाताको ध्यान कति तान्छ, त्यो भने निर्वाचनको परिणामले नै देखाउनेछ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
