२० बैशाख २०८३, आईतवार
२०८३ बैशाख २० गते, आईतवार १३:३४ मा प्रकाशित
जनमत पार्टीका अध्यक्ष डा. सीके राउतले प्रधानमन्त्री बालेन शाह नेतृत्वको सरकारको कार्यशैलीप्रति असन्तुष्टि जनाउँदै तत्काल आफ्नो बाटो सच्च्याउन चेतावनी दिएका छन्। सरकार बनेको सय दिन पनि पूरा नहुँदै राउतले सामाजिक सञ्जालमार्फत टिप्पणी सार्वजनिक गर्दै सरकारको ‘विकास’ सम्बन्धी अवधारणा र नागरिकप्रतिको व्यवहारमाथि प्रश्न उठाएका हुन्।
राज्यको परिभाषा केवल जमिन नभएर जनता भएको स्मरण गराउँदै उनले सरकार जनताको हेरचाहका लागि नियुक्त गरिएको तलबी कर्मचारी मात्र भएको टिप्पणी गरेका छन्। राज्यका संयन्त्रहरूले आफ्नो सीमा र अधिकारको दायरा भुल्न नहुने भन्दै उनले सत्ता र शक्तिको अहंकार पाल्नु भ्रम मात्र रहेको बताएका छन्।
सेना, बन्दुक, सत्ता वा सामाजिक सञ्जालका एल्गोरिदम र भ्यूजको भरमा आफूलाई जनताभन्दा माथि ठान्नु खतरनाक हुने राउतको विश्लेषण छ। उनले इतिहासको स्मरण गराउँदै भनेका छन्, ‘यसअघि यो तख्तमा बस्ने व्यक्तिलाई पनि आफू भगवान् भएको यस्तै विश्वास थियो।’
राज्य चलाउनेहरूलाई निर्णय गर्न गाह्रो भए गोल्डेन रुल अपनाउन सुझाव दिँदै उनले कुनै पनि कार्य गर्दा पीडितको ठाउँमा आफ्ना साना बालबच्चालाई राखेर सोच्न आग्रह गरेका छन्। नेपालमा राज्यले बालबालिकाका सबै कुरा खोसिदिएको र जापानमा एकजना बालिकाका लागि वर्षौँसम्म रेल चलाएको प्रसङ्ग उल्लेख गर्दै राउतले दुई देशको राज्यको व्यवहारमा आकाश-जमिनको अन्तर रहेको बताएका छन्।
राज्यले नागरिकमाथि गर्ने व्यवहारले नै भोलिको पुस्ताको धारणा तय गर्ने भन्दै उनले सरकारले चालेका पछिल्ला कदमहरूले भविष्यमा नकारात्मक परिणाम निम्त्याउन सक्ने संकेत गरेका छन्। सरकारले जनताको संरक्षण गर्नुपर्ने ठाउँमा उनीहरूलाई नै घरबारविहीन बनाउनु विधिको शासनविपरीत रहेको उनको निष्कर्ष छ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
