१९ असार २०८३, शुक्रबार
२०८३ असार १९ गते, शुक्रबार १०:५६ मा प्रकाशित
नेपाली औषधी बजारमा पछिल्लो समय नक्कली तथा झुटो विवरण भएका औषधीको बिक्री–वितरण बढेको र फिर्ता गरिएका औषधीसमेत बजारबाट न्यून परिमाणमा मात्र फिर्ता हुन थालेपछि औषधी व्यवस्था विभागले औषधी आपूर्ति शृङ्खला व्यवस्थित बनाउन ६ बुँदे निर्देशन जारी गरेको छ ।
निर्देशनअनुसार अब सबै स्वदेशी औषधी उत्पादक तथा पैठारीकर्ताले आफ्ना आधिकारिक थोक विक्रेतासँग लिखित सम्झौता गर्नुपर्नेछ । साथै, आधिकारिक थोक विक्रेताको अद्यावधिक सूची आफ्नै वेबसाइटमा प्रकाशित गर्नुका साथै विभागको आधिकारिक पोर्टलमा समेत उपलब्ध गराउनुपर्ने व्यवस्था गरिएको छ ।
अस्पताल, स्वास्थ्य संस्था तथा अन्य संस्थागत खरिदका लागि आपूर्ति गरिने औषधीको प्याकेजमा ‘संस्थागत आपूर्तिका लागि मात्र’ भन्ने स्पष्ट रूपमा उल्लेख गर्नुपर्ने र त्यस्ता औषधी खुद्रा बिक्रीका लागि प्रयोग गर्न नपाइने विभागले जनाएको छ ।
त्यसैगरी, थोक विक्रेताले विभागमा दर्ता भएका खुद्रा औषधी पसल, सरकारी स्वास्थ्य संस्था, अस्पताल तथा कानुनबमोजिम दर्ता भएका अन्य संस्थालाई मात्र औषधी बिक्री–वितरण गर्न पाउनेछन् । अनधिकृत व्यक्ति वा संस्थालाई औषधी बिक्री गर्न पूर्णरूपमा रोक लगाइएको छ ।
खुद्रा औषधी विक्रेताले पनि उत्पादक वा पैठारीकर्ताले आधिकारिक रूपमा तोकेका थोक विक्रेताबाट मात्र औषधी खरिद गर्नुपर्नेछ । खरिद गर्दा थोक विक्रेताको नाम, विभागमा दर्ता नम्बर तथा खरिद बिल अनिवार्य रूपमा सुरक्षित राख्नुपर्ने व्यवस्था गरिएको छ । विभागले आगामी आर्थिक वर्ष २०८३÷८४ देखि थोक विक्रेताले बिक्री–वितरण प्रमाणपत्र नवीकरण गर्दा उत्पादक वा पैठारीकर्तासँग भएको लिखित सम्झौताको प्रमाणित प्रतिलिपि अनिवार्य रूपमा पेश गर्नुपर्ने व्यवस्थासमेत लागू गरेको छ ।
विभागका अनुसार यी व्यवस्थाले औषधीको आपूर्ति शृंखलालाई थप पारदर्शी, व्यवस्थित र सुरक्षित बनाउने, नक्कली तथा गुणस्तरहीन औषधीको कारोबार नियन्त्रण गर्ने तथा जनस्वास्थ्यको जोखिम न्यूनीकरण गर्न सहयोग पुग्ने अपेक्षा गरिएको छ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
