१३ मंसिर २०८१, बिहीबार
२०७६ जेष्ठ १० गते, शुक्रबार १२:५९ मा प्रकाशित
मलेसियाका मानव संशाधनमन्त्री एम कुलासेगरनले स्वास्थ्य परीक्षणको गाँठो एक हप्ताभित्र फुकाउने जानकारी दिएका छन् । बिहीबार क्वालालुम्पुरस्थित नेपाली राजदूत उदयराज पाण्डे र मलेसियाका मानव संशाधनमन्त्री एम कुलासेगरनबीच भएको भेटवार्तामा मन्त्री सेगरनले यस्तो आश्वासन दिएका हुन् ।
मलेसियाले स्वास्थ्य परीक्षणको मापदण्ड अर्थात एसओपी नेपाललाई पठाएपछि नेपालले त्यही आधारमा नयाँ तथा पुराना स्वास्थ्य संस्थालाई स्वास्थ्य परीक्षणका लागि दर्ता हुन सार्वजनिक आह्वान गरेको थियो ।
अहिले नयाँ तथा पुराना स्वास्थ्य संस्था गरी २ सय ९० स्वास्थ्य संस्थाले मलेसिया रोजगारीको स्वास्थ्य परीक्षणमा जोडिन निवेदन दिएका छन् । त्यसबाहेक सरकारी अस्पताललाई समेत यस कार्यमा सहभागी गराउन खोजिएको छ । सरकारी अस्पतालको हकमा स्वास्थ्य मन्त्रालयले नै सिफारिस गर्न सक्ने अधिकार छ । यसरी हेर्दा करिब ३ सय नयाँ तथा पुराना गरी स्वास्थ्य संस्थाले मलेसिया रोजगारीको स्वास्थ्य परीक्षणमा जोडिन चाहेको छ ।
तर मलेसियाबाट स्वास्थ्यको मापदण्ड आएपनि अनुगमनका लागि टोली नआउँदा स्वास्थ्य संस्था छनोट हुन सकेको छैन । यद्यपि नेपालको तर्फबाट हालसम्म ९४ वटा स्वास्थ्य संस्थाको अनुगमन भइसकको छ ।
मलेसियाबाट टोली नआउँदा स्वास्थ्य संस्था छनोट हुन नसकेपछि नेपालले दूतावासमार्फत् यसको गाँठो फुकाइदिन मानव संशाधनमन्त्री कुलासेगरनलाई आग्रह गरेको थियो ।
बिहीबारको भेटमा मन्त्री कुलासेगरनले स्वास्थ्य परीक्षणको गाँठो एक साताभित्र फुकाउने आश्वासन दिएको क्वालालुम्पुरस्थित नेपाली राजदूत उदयराज पाण्डेले बताए ।
बिहीबारको छलफलमा नेपालले स्वास्थ्य परीक्षणको टोली पठाइदिन आग्रह गरेको राजदूत पाण्डेले जानकारी दिए । जवाफमा मन्त्री सेगरनले अबको एक साताभित्र अन्तर मन्त्रालय छलफल गरेर यसको टुङ्गो लगाउने जवाफ दिएका थिए ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
